बनेपा, जिल्ला निर्वाचन कार्यालयले काभ्रे जिल्लामा रहेका मतदाताहरुको नामावलीको त्रुटी सच्याउन, दोहोरो हेर्न तथा मृतकका नामहरु हटाउनको लागि भाद्र १३ देखि १५ गतेसम्म आह्वान गरेको छ ।
मसिंर ४ गते हुने प्रतिनिधि सभा र प्रदेश सभा निर्वाचनका लागि मतदाता नामावली भरेर विग्रेकालाई सच्याउने, दोहोरो भएकालाई हटाउने तथा मृतकका नामहरु हटाउन दावी विरोध गर्ने गरी भाद्र १३ देखि १५ गते सम्म निर्वाचन कार्यालय, सम्बन्धित पालिका र वडामा उजुरी गर्न भनिएको छ । मतदाता नामावली अद्यावधिक कार्यक्रम अन्तर्गत भाद्र १३ देखि १५ गतेसम्म जिल्ला निर्वाचन कार्यालयमा नमावली हेर्ने, त्रुटि सच्याउने, दोहोरो हटाउने, मृत्यु भएका ब्यक्तिका नाम हटाउने र दावी विरोध गर्न पाईने जिल्ला निर्वाचन अधिकारी उमेश राईले जानकारी दिए ।
संसदीय निर्वाचनमा २०७९ साउन १९ गतेसम्म मतदाता नामावलीमा दर्ता भएका मसिंर ३ गतेसम्म १८ वर्ष पुगेका मतदाताहरुले मतदानमा भाग लिन पाउनेछन् । जस अनुसार प्रतिनिधि सभा १ को क निर्वाचन क्षेत्रमा ७७ हजार २ सय ९९, ख निर्वाचन क्षेत्रमा ७७ हजार १ सय २४ मतदाता गरि १ लाख ५४ हजार ४ सय २३ मतदाता रहेका छन् । त्यस्तै प्रतिनिधि सभा निर्वाचन क्षेत्र नम्वर २ को क मा ७७ हजार ६ सय ३१ मतदाता र ख निर्वाचन क्षेत्रमा ८१ हजार १ सय ८८ गरी १ लाख ५८ हजार ७ सय ५४ मतदाता रहेका छन् । जिल्लागत हिसावका १ लाख ५९ हजार ४ सय ३ पुरुष र १ लाख ५३ हजार ७ सय ७२ महिला गरी ३ लाख १३ हजार १ सय ७७ मतदाता रहेका छन् । स्थानीय तहको निर्वाचनमा ३ लाख ३ हजार ५ सय ६० मतदातामा ९ हजार ६ सय १७ मतदाता थपिएका छन् । थपिएका समेत गरेर दुबै निर्वाचन क्षेत्रमा मसिंर ३ गतेसम्म ३ लाख १३ हजार १ सय ७७ मतदाता १८ वर्ष पुगेका हुनेछन् । मतदाता नामावली भाद्र १२ गते वडा कार्यालय, निर्वाचन आयोगको कार्यालय र वेभसाईटमा नामावली प्रकाशन हुनेछ ।