बनेपा, तत्कालीन सञ्चार तथा सूचना प्रविधिमन्त्री, विकास प्रेमी काभ्रेली नेता गोकुलप्रसाद बाँस्कोटाले अधि सारेको महत्वपुर्ण योजना मध्येको एक सुरक्षण मुद्रण केन्द्र (सेक्यूरिटी प्रिन्टिङ प्रेस) बाट आउँदो छ महिनाभित्र अन्तःशुल्क स्टिकर छाप्न शुरु हुने भएको छ ।
पनौती नगरपालिका–५ मा रहेको उक्त केन्द्रमा गत कात्तिकमा इराकबाट ल्याई जडित दुई थान मेसिनबाट नमूनाका रूपमा अन्तःशुल्क ‘स्टिकर’ छापिएको छ । केहि समयअघि अर्थमन्त्री जनार्दन शर्माले उक्त केन्द्रको अनुगमन गर्दै केन्द्रमै मन्त्रालयलाई आवश्यक पर्ने अन्तःशुल्क स्टिकर तत्कालै छापेर उपलब्ध गराउन निर्देशन दिएका थिए । उनले मन्त्रालयलाई वार्षिक रु तीन अर्ब अन्तःशुल्क स्टिकर आवश्यक पर्ने भएकाले मेशिन थप गर्नसमेत आग्रह गरेका थिए । केन्द्रले छ महिनापछि अन्तःशुल्क स्टिकर उत्पादन गर्न सकिने जनाएको छ । केन्द्रका निर्देशक विकल पौडेलले हाल जडित दुई मेशिनबाट वार्षिक ६० करोड अन्तःशुल्क स्टिकर छाप्न सकिने बताए ।
उनका अनुसार बजेट अभावका कारण हाल भौतिक निर्माणबाहेकको सबै काम बन्द अवस्थामा रहेको छ । केन्द्र परिसरमा गोदाम भवन निर्माण भइरहेको छ । केन्द्रमा गत कात्तिकमा अन्तःशुल्क स्टिकर छाप्ने दुई थान उच्च सुरक्षित डिजिटल मुद्रण मेशिन (हाई सेक्युरिटी डिजिटल प्रिन्टिङ मेसिन) र एक थान डाई कटिङ मेशिन ल्याइएको थियो । गत आवको रु ७३ करोड बजेटबाट उक्त मेशिन तथा केही सूचना–प्रविधिका सामग्री खरीद गरिएको हो । केन्द्रको भौतिक पूर्वाधार निर्माणका लागि तत्कालीन सञ्चार तथा सूचना प्रविधिमन्त्री गोकुलप्रसाद बाँस्कोटाको पहलमा प्रारम्भिक बजेट विनियोजन भई सूचना–प्रविधि (आइटी पार्क) मा प्रेसको काम सुरु गरिएको थियोे ।
प्रारम्भिक चरणमा करिब रु ३३ अर्बमा निर्माण सम्पन्न गर्ने योजना बनाइएको केन्द्र निर्माण सम्पन्न गर्नका लागि क्रमागत बजेट विनियोजन गरिने जनाइए पनि चालू आवमा एकीन बजेट विनियोजन गरिएको छैन । उक्त सेक्यूरिटी प्रिन्टिङ प्रेसमा राहदानी, बैंक नोट, चालक अनुमतिपत्र, स्मार्टकार्ड, हुलाक टिकट, अन्तःशुल्क स्टिकर, सिमकार्डलगायत सुरक्षित छपाइका लागि पार्कमा केन्द्र स्थापना गर्ने निर्णय गरिएको थियो ।
प्रेस सञ्चालनमा आएपछि सुरक्षित मुद्रणवापत नेपालबाट वार्षिक रूपमा बाहिरिने रु १० अर्ब जोगिँदै जाने अपेक्षा गरिएको छ । केन्द्रका लागि २०० प्राविधिकसहित करिब एक हजार जनशक्तिको आवश्यकता पर्नेछ । कूल २५७ रोपनी जमिनमा अवस्थित पार्कभित्र हाल दुई वटा ठूला व्यापारिक÷प्रशासनिक भवन तथा चार वटा सुविधा सम्पन्न आवासीय भवनलगायत नौ भवन रहेका छन् ।